2. Sawaal Bemisaal.

 Sir ne pooche 10 prashn bemisaal,

Sunkar aaya antar me bhoochaal,

Ye kya program fit kar diya bhai 

Khada kar diya ek naya bawaal.

Sun raha hu Adhyatma, beete kai saal,

Lekin kya poocha hai khud ka haal?

Sach me paana hai, iccha hai paane ki?

Ya phir chal raha hu moh ki chaal?

Paana kya hai, hai koi khayaal?

Ya keval soch me dooba hu filhaal?

Aur praapti se kya laabh hoga?

Apraapti se kya hoga malaal?

Hai purusharth jo kar de maalamaal?

Ya chal rahi gaadi, dheemi chaal?

Thakaan lagi hai paribhraman ki?

Nahi, to kyu nahi, poocha sawaal?

Gnaaniyo ne aisa kya kiya kamaal,

Chhoot gaye wo, todke maaya jaal,

Kya mujhe chhootna nahi ye vichaar se,

Ki kya hoga jab aayega antim kaal?

Konse saadhano ka karu istemaal?

Mit jaaye bandhan, sudhar jaaye haal,

Dhyaan Jap Seva Pooja Bhakti Swadhyay,

Kya bana nahi sakta inko dhaal ?

Beet chuka hai jeevan ka antaraal, 

Isi waqt apne aapko lu sambhaal,

Gun Dosh parakh, apni gati badhau,

Machaa sakta hu, Adhyatma me dhamaal

10 questions were asked during Aurangabad Shibir